Foka Ba Futuru mak website ida ba foinsa’e Timoroan sira atu asesu informasaun kona-ba profisaun sira iha sektór no perkursu oioin hosi eskola ba iha profisaun hirak-ne’e.

Mai hasoru malu ho ema sira ne’ebé ko’alia kona-ba perfíl serbisu ida-idak iha Vídeo Introdutória ba Karreira nian. Buka-hatene atu hetan abilidades ne’e iha-ne’ebé no mós kursu-estudu saida mak disponível iha Timor atu sai kualifikadu ba karreiras ne’ebé ita-boot iha interese ba. Deskobre oinsá mak atu asesu informasaun kona-ba kursu edukasionál sira, no mós Lista Empregu tuir Sektór

Fundasaun Ázia, liuhosi projetu Foka Ba Futuru ne’ebé finansiadu hosi Governu Australianu, serbisu daudaun hodi promove empregu ba foinsa’e sira ih sektór oioin através konxientizasaun ba tipu oioin hosi oportunidades ba karreira nian iha sektór hirak-ne’e nia laran, no mós perkursu entre  eskola no karreira partikulár ida.

Konkursu Vídeo Introdutóriu ba Karreira

Projetu Foka ba Futuru nian kria ona konkursu ida ba estudantes universitáriu no mós ensinu tékniku profisionál no formasaun nian (TVET) atu dezenvolve, filma no prodús filme badak sira ne’ebé sei aprezenta karreiras espesífiku no ema sira iha indústria turizmu no ospitalidade nian. Filme sira-ne’e sei organiza iha website ida-ne’e no mós Facebook no sei sai hanesan baze ba biblioteka krexente hosi vídeos referénsia ba karreira nian. Hosi tempu ba tempu, Fundasaun Ázia sei inklui sektór sira seluk. Se karik ita-boot hakarak atu hatama Vídeo Introdutória ba Karreira nian, klike iha ne’e. Objetivu ida hosi Foka ba Futuru nian maka tu harii no liga foinsa’e Timoroan sira ba empregu sira iha ekonomia lokál nian. ida-ne’e estabelese bazeia ba konkursu video mak hanesan ne’ebé hetan susesu iha Kamboja, bele haree nia ezemplu sira iha  http://careeroncamera.org.

Simplesmente haree vídeo sira-ne’e no klike ‘gosta’. Vídeo ne’ebé ema gosta barakliu mak sei manán.

Kontestu Timor

Populasaun Timor-Leste nian sei joven tebes, iha tinan 2015, 39% mak ho idade tinan 15 mai kraik, no iha tinan balun oinmai, populasaun sira ho idade ativa nian sei aumenta hosi 696,300 iha tinan 2013 ba 913,800 iha tinan 2023.

Sektór ospitalidade no turizmu nian reprezenta oportunidade ida ba kreximentu empregu nian tanba Governu Timor iha planu atu aumenta Ekonomia Turizmu nian hosi Millaun $24 kada tinan ba Millaun $150 resin iha tinan 2030.

Kria Mudansa

Fundasaun Ázia (TAF) nia objetivu prinsipál ida iha Timor-Leste mak atu habelar oportunidade ekonómika no hasa’e diversifikasaun ba ekonomia la’ós-pretrolífera nian. Iha tinan hirak foin lailais ne’e, TAF serbisu daudaun ona hodi haburas sektór sira turizmu no ospitalidade nian liuhosi fó apoiu ba polítika governu nian no mós partisipasaun sektór privada nian. Rezultadu xave ida hosi Ekonomia Turístika ida ne’ebé luan liu mak kriasaun empregu ba númeru krexente hosi populasaun joven sira ne’ebé mak buka-serbisu. Atu alkansa objetivus prinsipál iha Polítika Turizmu nian, nesesáriu  atu hamosu mudansa signifikativa ida iha merkadu traballu nian hodi prodús traballadór sira ne’ebé mak kualifikadu tebetebs, maibé mós ba foinsa’e Timoroan sira atu haree ba indústria turizmu no ospitalidade nian hanesan karreira ida dezejável. Tanba indústria turizmu ne’e sei foun hela, entaun foinsa’e sira menus koñesimentu kona-ba tipu empregu saida mak disponível ba agora daudaun no mós saida mak sei disponível iha aban-bainrua. Alende ne’e, menus koñesimentu kona-ba oinsá mak atu hetan serbisu ida iha indústria turizmu nian, kualifikasaun no abilidades saida deit mak nesesáriu, no mós serbisu saida deit mak adekuada ba tipu personalidade oioin. Falta iha sistema apoiu akonsellamentu ba karreira nian no mós informasaun kona-ba karreiras iha ospitalidade no turizmu, menus vizibilidade ba modelu no personalidades iha indústria ida-ne’e, no mós auzénsia hosi sistema mentoria ida ne’ebé bele forma estudante sira nia talentu atu hili karreira ida serta tuir sira-nia preferénsia (talentu pesoál, pontus forte ka interese) bele hamosu frustrasaun iha estudante sira-nia leet. Website ida-ne’e no pájina Facebook nian ne’e iha objetivu atu fornese informasaun no rekursus ba foinsa’e sira no mós ema sira ne’ebé buka-serbisu atu ajuda sira ho opsaun sira ba karreira nian no mós komprende kona-ba perkursu entre eskola no empregu iha karreira ida espesífiku. TAF kolabora ho Departamentu Negósius Estranjeiru no Komérsius (DFAT) Australianu nia  Programa Dezenvolvimentu Forsa Traballu nian iha projetu Foka ba Futuru (Film the Future ka FTF).

Ami espera katak website ida-ne’e no mós pájina Facebook relasionadu sei fornese informasaun ne’ebé útil ba ema sira ne’ebé buka-serbisu no mós estudante sira. Ami apresia kualkér komentárius kona-ba saida mak ita-boot harakarak atu haree iha ne’e – halo favór uza formuláriu komentáriu nian ida-ne’e.

Top